Chiranjeevi : మెగాస్టార్ చిరంజీవి తిరిగి రాజకీయాల్లోకి వస్తారా? బీజేపీలో చేరతారా? ఆ పార్టీకి రాష్ట్ర అధ్యక్ష బాధ్యతలు చేపడతారా? ప్రస్తుతం ఏపీ రాజకీయ వర్గాల్లో చర్చనీయాంశంగా మారిన ఈ అంశంపై వాస్తవం ఎంత అనే దానిపై ఆసక్తి నెలకొంది.
ప్రస్తుతం చిరంజీవి రాజకీయాలకు పూర్తిగా దూరంగా ఉంటూ తన సినిమాల్లో బిజీగా ఉన్నారు. గత ఎన్నికల్లో ఆయన జనసేనకు పరోక్షంగా మద్దతు ప్రకటించి, పవన్ కళ్యాణ్కు ఓటు వేసి గెలిపించాలని విజ్ఞప్తి చేసినప్పటికీ ప్రత్యక్ష ప్రచారంలో పాల్గొనలేదు. మెగా కుటుంబం కూడా జనసేనకు పరిమితమైన మద్దతునే ఇచ్చింది. నాగబాబు మాత్రం పార్టీ సభ్యుడిగా ప్రచారంలో చురుగ్గా పాల్గొన్నారు. అయితే చిరంజీవి రాజకీయాల్లోకి తిరిగి వస్తారని, ముఖ్యంగా బీజేపీలో చేరతారని కొన్ని వర్గాల్లో ప్రచారం జరుగుతోంది.
2009లో ప్రజారాజ్యం పార్టీని స్థాపించి ఎన్నికల బరిలో దిగిన చిరంజీవి, తక్కువ సీట్లు గెలుచుకోవడంతో ఆ పార్టీని కాంగ్రెస్లో విలీనం చేశారు. అనంతరం కేంద్ర మంత్రి హోదా పొందారు. 2014 రాష్ట్ర విభజన తర్వాత కాంగ్రెస్ ఏపీలో పూర్తిగా క్షీణించడంతో, ఆయన రాజకీయాలకు దూరంగా వెళ్లిపోయి సినిమాలపై దృష్టిపెట్టారు. అప్పటినుంచి రాజకీయాల్లోకి రానని స్పష్టం చేసిన చిరంజీవి, ఇప్పుడోసారి బీజేపీలోకి వెళ్లబోతున్నారన్న ప్రచారం ఊపందుకుంది.
ఈ నేపథ్యంలో బీజేపీ ఏపీలో తన స్థానాన్ని బలపడించేందుకు చిరంజీవిని ముందుకు తీసుకురావాలని కేంద్ర పెద్దలు యోచిస్తున్నారని వార్తలు వినిపిస్తున్నాయి. పవన్ కళ్యాణ్ ఇప్పటికే జనసేనతో బీజేపీకి మద్దతునిస్తున్నప్పటికీ, చిరంజీవిని బీజేపీ రాష్ట్ర అధ్యక్షుడిగా చేసి టీడీపీకి చెక్ పెట్టాలనే వ్యూహం రూపొందించారని ప్రచారం జరుగుతోంది. అయితే పవన్ కళ్యాణ్ మాత్రం చిరంజీవి రాజకీయాలకు తగ్గ వ్యక్తి కాదని భావిస్తున్నారని, ఆయనను గౌరవనీయ స్థాయిలో చూడాలనే అభిప్రాయం కలిగి ఉన్నారని తెలుస్తోంది.
ప్రస్తుతం ఏపీ బీజేపీ అధ్యక్షురాలిగా పురందేశ్వరి ఉన్నారు. ఆమె పదవి కొనసాగుతుందా, లేక కొత్త నేత వస్తారా అనే దానిపై స్పష్టత లేదు. చంద్రబాబు కూడా ఈ విషయంలో పురందేశ్వరిని మద్దతుగా ఉంచాలనే యత్నించినట్లు ప్రచారం ఉంది. ఆమెను మార్చాల్సి వస్తే మాజీ సీఎం కిరణ్ కుమార్ రెడ్డిని ఆ పదవికి తీసుకురావాలని చంద్రబాబు సూచించినట్లు సమాచారం. అయితే బీజేపీ అగ్రనాయకత్వం చిరంజీవిని రంగంలోకి దింపాలనే ఆలోచనలో ఉందని, కానీ చిరంజీవి వ్యక్తిగతంగా దానికి ఆసక్తి చూపకపోవడంతో ఇది కేవలం ఊహాగానంగా మిగిలిపోయే అవకాశముందనే అభిప్రాయం వ్యక్తమవుతోంది.
ఇక పవన్ కళ్యాణ్, చిరంజీవి ఇద్దరూ ఈ విషయంపై ఎలాంటి స్పందన ఇవ్వకపోవడంతో, బీజేపీ వ్యూహం ఎంతవరకు అమలు అవుతుందో అనేది చూడాల్సిందే. మొత్తం మీద చిరంజీవి రాజకీయ రీఎంట్రీ పై జరుగుతున్న ప్రచారం వాస్తవానికి దూరంగా ఉండే అవకాశమే ఎక్కువగా కనిపిస్తోంది.
