జనసేన అధినేత పవన్ కళ్యాణ్ సనాతన ధర్మంపై చేస్తున్న వ్యాఖ్యలు రాజకీయ వర్గాల్లో తీవ్ర చర్చకు దారి తీశాయి. ఈ వ్యాఖ్యలను సీపీఐ జాతీయ కార్యదర్శి నారాయణ తీవ్రంగా ఖండించారు. సనాతన ధర్మాన్ని సమర్థించే పవన్ కళ్యాణ్‌ను తక్షణమే అరెస్ట్ చేయాలని ఆయన డిమాండ్ చేశారు.
నారాయణ మాట్లాడుతూ, పవన్ కళ్యాణ్ ప్రస్తావించే సనాతన ధర్మం క్రూరమైనది, అరాచకమైనది అని అభివర్ణించారు. ఇలాంటి ధర్మాన్ని సమర్థించే ఎవరినైనా అరెస్ట్ చేయాల్సిందేనని ఆయన స్పష్టం చేశారు. ఈ సందర్భంగా, నారాయణ పవన్ కళ్యాణ్‌కు ఒక సూటి ప్రశ్న సంధించారు: “సనాతన ధర్మంలో విడాకులకు స్థానం లేనప్పుడు పవన్ కళ్యాణ్ ఎలా విడాకులు తీసుకున్నారు?” ఈ ప్రశ్నకు పవన్ కళ్యాణ్ సమాధానం చెప్పాలని నారాయణ గట్టిగా నిలదీశారు.
“సనాతన ధర్మాన్ని విమర్శించే వారిపై పవన్ కళ్యాణ్ చర్యలు తీసుకోవాలని కోరుతున్నారు, కానీ ఆ ధర్మాన్ని సమర్థించే వారికే శిక్ష పడాలి,” అని సీపీఐ జాతీయ కార్యదర్శి నారాయణ అన్నారు. పవన్ కళ్యాణ్ తన వైఖరిని స్పష్టం చేసుకోవాలని, లేనిపక్షంలో ప్రజలు ఆయన నిజస్వరూపాన్ని అర్థం చేసుకుంటారని నారాయణ హెచ్చరించారు. ఈ వ్యాఖ్యలు ప్రస్తుతం రాజకీయాల్లో హాట్ టాపిక్‌గా మారాయి.
