ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కళ్యాణ్ చేసిన వ్యాఖ్యలపై సీపీఐ జాతీయ కార్యదర్శి వర్గ సభ్యులు డాక్టర్ కే. నారాయణ తీవ్ర స్థాయిలో స్పందించారు. పవన్ కళ్యాణ్ వ్యాఖ్యలు రెండు తెలుగు రాష్ట్రాల ప్రజల మధ్య విబేధాలు సృష్టించే విధంగా ఉన్నాయని ఆరోపిస్తూ, ఆయనను వెంటనే పదవి నుంచి బర్తరఫ్ చేయాలని ముఖ్యమంత్రి చంద్రబాబు నాయుడును నారాయణ డిమాండ్ చేశారు.
సీపీఐ నారాయణ బుధవారం నాడు మీడియాతో మాట్లాడుతూ పవన్ కళ్యాణ్ వైఖరిపై తీవ్ర అభ్యంతరం వ్యక్తం చేశారు. “పవన్ కళ్యాణ్ వ్యాఖ్యలు ఇరు రాష్ట్రాల ప్రజల మధ్య విబేధాలు రేకెత్తించే విధంగా ఉన్నాయి. రాజకీయంగా విమర్శలు చేసుకోవచ్చు, కానీ ప్రజల మధ్య చిచ్చుపెట్టేలా మాట్లాడటం తగదు” అని నారాయణ అన్నారు.
గతంలో పవన్ కళ్యాణ్ వ్యవహరించిన తీరును నారాయణ ఈ సందర్భంగా గుర్తుచేశారు. “గతంలో పవన్ కళ్యాణ్ చేగువేరా వేషం ధరించి తాను ఒక విప్లవకారుడిని అని చెప్పుకున్నాడు. ఆ సమయంలో ఆయన మాటల్లో విప్లవ భావాలు ఉండేవి. ఇప్పుడు ఆయన సనాతన ధర్మంలో ఉన్నానని చెబుతూ, ఎదుటివారిని ఉద్దేశిస్తూ ‘దిష్టి’ వంటి పదాలు వాడుతున్నారు” అని నారాయణ విమర్శించారు. ఒక ప్రజాప్రతినిధి, ముఖ్యంగా ఉప ముఖ్యమంత్రిగా ఉన్న వ్యక్తి ఇటువంటి వ్యాఖ్యలు చేయడం బాధ్యతారాహిత్యమని ఆయన మండిపడ్డారు.
పవన్ కళ్యాణ్ వ్యాఖ్యల పర్యవసానాలను పరిగణనలోకి తీసుకుని, ఇటువంటి విద్వేషపూరిత సంకేతాలు ఇచ్చే నేతను మంత్రివర్గంలో కొనసాగించడం సరైంది కాదని నారాయణ స్పష్టం చేశారు. “ఇటువంటి మాటల ద్వారా సమాజంలో అశాంతిని సృష్టించేందుకు ప్రయత్నిస్తున్న పవన్ కళ్యాణ్ను తక్షణమే డిప్యూటీ సీఎం పదవి నుంచి బర్తరఫ్ చేయాలని” సీపీఐ తరపున నారాయణ ఏపీ ప్రభుత్వాన్ని కోరారు.
పవన్ కళ్యాణ్ వ్యాఖ్యలపై రాష్ట్ర రాజకీయాల్లో ఇప్పటికే చర్చ జరుగుతున్న నేపథ్యంలో, సీపీఐ నారాయణ చేసిన ఈ డిమాండ్ మరింత దుమారాన్ని రేపే అవకాశం ఉంది.
