ఏపీ రాజకీయాల్లో మరోసారి వేడి పెరిగింది. గోరంట్ల బుచ్చయ్య చౌదరి సంచలన వ్యాఖ్యలతో జనసేన–టీడీపీ కూటమిపై జరుగుతున్న ప్రచార యుద్ధాన్ని తీవ్రంగా ఖండించారు. పవన్ కల్యాణ్ ను లక్ష్యంగా చేసుకుని దుర్మార్గులు కావాలని రెచ్చగొడుతున్నారని, సోషల్ మీడియాలో జనసేన పార్టీ ను అసమర్థంగా చూపించే ప్రయత్నాలు జరుగుతున్నాయని ఆయన ఆరోపించారు.
బుచ్చయ్య చౌదరి మాట్లాడుతూ “సినిమావాళ్లను రెచ్చగొడుతూ, పవన్ కల్యాణ్ గారిపై తప్పుడు కథనాలు సృష్టిస్తున్నారు. కూటమిని విచ్ఛిన్నం చేయాలనే ఉద్దేశంతోనే ఈ ప్రచారం సాగుతోంది” అని స్పష్టం చేశారు. ఈ విషయంలో పార్టీ శ్రేణులు అప్రమత్తంగా ఉండాలని ఆయన సూచించారు.
పవన్ కల్యాణ్పై జరుగుతున్న విమర్శల వెనుక కుట్ర కోణం ఉందని పేర్కొన్న బుచ్చయ్య చౌదరి, “మనం ఒక విజనరీ నాయకత్వంలో పని చేస్తున్నాం అని పవన్ కల్యాణ్ గారు స్పష్టంగా అర్థం చేసుకున్నారు. కూటమి లక్ష్యాలపై ఆయనకు పూర్తి స్పష్టత ఉంది” అని వ్యాఖ్యానించారు. ఈ మాటలతో కూటమిలో విభేదాలంటూ వస్తున్న వార్తలకు తెరదించేందుకు ప్రయత్నించారు.
సోషల్ మీడియా వేదికగా అసత్య ప్రచారాలు, ట్రోలింగ్ పెరిగిందని, ఇవన్నీ ప్రజలను గందరగోళానికి గురిచేయడానికే అని ఆయన మండిపడ్డారు. కూటమి బలాన్ని దెబ్బతీయాలనే లక్ష్యంతోనే కొన్ని వర్గాలు కావాలనే దుష్ప్రచారం చేస్తున్నాయని విమర్శించారు.
ఈ వ్యాఖ్యల నేపథ్యంలో తెలుగుదేశం పార్టీ–జనసేన కూటమి ఐక్యతపై సందేహాలకు తావులేదని పార్టీ నేతలు స్పష్టం చేస్తున్నారు. ప్రజా సమస్యలపై కలిసి పోరాటం చేస్తామని, వ్యక్తిగత దాడులు, దుష్ప్రచారాలకు కూటమి భయపడదని స్పష్టమైన సంకేతాలు ఇస్తున్నారు.
