జనసేన పార్టీకి చెందిన ఓ ఎమ్మెల్యేపై లైంగిక వేధింపుల ఆరోపణలు రావడం రాజకీయ వర్గాల్లోనే కాకుండా మీడియా, సోషల్ మీడియాలో కూడా తీవ్ర చర్చకు దారి తీసింది. ఈ వ్యవహారంపై మహా టీవీ యాంకర్ వంశీ చేసిన సెటైర్ ఇప్పుడు వైరల్గా మారింది.
ఒక మహిళను లైంగికంగా వేధించిన ఆరోపణలు ఎదుర్కొంటున్న వ్యక్తి ఎమ్మెల్యే కావడం, ప్రజాప్రతినిధిగా ఉండటం అత్యంత బాధ్యతారాహిత్యమని వంశీ తన సెటైరికల్ వ్యాఖ్యల్లో తీవ్రంగా విమర్శించారు. “ఒక శాసనసభ్యుడు అంటే కేవలం పదవి కాదు.. ప్రజలకు ఆదర్శంగా ఉండాల్సిన వ్యక్తి. ముఖ్యంగా పవన్ కళ్యాణ్ ఆలోచనలు, విధానాలను అనుసరిస్తానని చెప్పే జనసేన ఎమ్మెల్యే ఇలాంటి ఆరోపణల్లో చిక్కితే పార్టీ పరువే ప్రశ్నార్థకం అవుతుంది” అంటూ ఘాటైన వ్యాఖ్యలు చేశారు.
వంశీ మాటల్లో ముఖ్యంగా వినిపించిన అంశం ఒక్కటే ఇలాంటి కేసుల్లో ఆలస్యం లేకుండా చర్యలు తీసుకోవాలి. ఆరోపణలు వచ్చిన వెంటనే ఆ ఎమ్మెల్యేను పార్టీ నుంచి సస్పెండ్ చేసి, నిష్పక్షపాత విచారణ జరపాలని ఆయన డిమాండ్ చేశారు. “ముందు సస్పెండ్ చేసి, తర్వాత ఎంక్వైరీ చేయడం జనసేన కనీస ధర్మం. లేదంటే పవన్ కళ్యాణ్ పేరు, జనసేన పార్టీ ప్రతిష్ఠ మంటగలుస్తుంది” అంటూ చేసిన వ్యాఖ్యలు నెటిజన్లను ఆలోచింపజేశాయి.
ఈ సెటైర్కు సోషల్ మీడియాలో భారీ స్పందన లభిస్తోంది. కొందరు వంశీ ధైర్యంగా నిజం మాట్లాడారని ప్రశంసిస్తే, మరికొందరు రాజకీయంగా ఇది సున్నితమైన అంశమని అభిప్రాయపడుతున్నారు. అయినప్పటికీ, మహిళల భద్రత, ప్రజాప్రతినిధుల బాధ్యత అనే అంశాలపై ఈ చర్చ సమాజంలో అవసరమైనదేనని చాలా మంది అంటున్నారు.
మొత్తానికి జనసేన పార్టీపై, అలాగే పార్టీ అధినేత పవన్ కళ్యాణ్ తీసుకునే నిర్ణయాలపై ఇప్పుడు అందరి దృష్టి పడింది. ఈ ఆరోపణలపై పార్టీ ఎలా స్పందిస్తుందన్నది రాజకీయంగా కీలకంగా మారింది.
