శ్రీకాకుళం జిల్లాలో ఎలుగుబంట్లు, అటవీ జంతువుల సంచారం పెరిగింది. ముఖ్యంగా ఉద్దానం ప్రాంతంలో ఈ జంతువుల చలనం ప్రజలను భయపెడుతోంది. ఎలుగుబంట్ల దాడిలో కొంతమంది ప్రాణాలు కోల్పోయారు. ఇలాంటి పరిస్థితుల్లో, శ్రీకాకుళం జిల్లా ఉద్దాన ప్రాంతంలో మరో విచిత్రమైన జంతువు కనిపిస్తోంది. రాత్రి సమయంలో గొర్రెలు, మేకలు, పశువుల దూడలపై దాడి చేస్తూ ప్రాణాలు తీస్తోంది. గత కొన్ని రోజుల్లో, ఈ వింత జీవి చేతిలో అనేక మూగ జీవాలు ప్రాణాలు కోల్పోయాయి. కొంతమంది దీనిని పులి అని అంటుంటే, మరికొందరు చిరుత అని చెబుతున్నారు. అయితే, అటవీ శాఖ అధికారులు దీనిని అడవి పిల్లగా పేర్కొంటున్నారు. ఈ వింత జీవి రాత్రి సమయంలో గ్రామాలకు దూరంగా ఉన్న పశువులను లక్ష్యంగా చేసుకుంటోంది. ఒక్కసారిగా దాడి చేస్తోంది, దీంతో ప్రజలు భయాందోళనకు గురవుతున్నారు.
ఈ జంతువు పులి పిల్లల మాదిరిగా కనిపిస్తోంది. పులి చారలతో ఉన్న ఈ జంతువు, పులి కంటే కొంచెం పొట్టిగా ఉన్నట్లు చూసినవారు చెబుతున్నారు. ఇది చాలా చురుకుగా ఉంటూ, కంటికి కనిపించినట్టే కనిపించి, మెరుపు వేగంతో మాయమవుతోందని అంటున్నారు. ముఖ్యంగా పలాస, ఇచ్చాపురం నియోజకవర్గాల్లో సంచరిస్తూ ప్రజలకు నిద్ర లేకుండా చేస్తోంది. ప్రత్యేకంగా గొర్రెల కాపరులకు, పశు పోషకులకు ఇది భయానకంగా మారింది.
ప్రతి ఏడాది చలికాలంలో ఈ వింత జంతువు ఉద్దానంలో ప్రవేశిస్తోంది. కానీ, అటవీ శాఖ అధికారులు దీన్ని నియంత్రించడంలో విఫలమయ్యారు. వారు కేవలం దాని పాదముద్రలను సేకరించడంలో మాత్రమే పరిమితమవుతున్నారు. ఉద్దాన ప్రాంతంలో దండోరా వేయిస్తున్నారు. శ్రీకాకుళం జిల్లాకు సమీపంలో ఒడిస్సా వరకు దట్టమైన దండకారణ్యం ఉంది. మహేంద్రగిరిలో ఇది విస్తరించేది. కానీ, అడవులు నేలమట్టం అవుతున్నాయి. కొండలు కరిగిపోతున్నాయి. దీంతో అటవీ జంతువులు గ్రామాలపై పడుతున్నాయి. ఇప్పటికైనా కూటమి ప్రభుత్వం ప్రత్యేకంగా దృష్టి పెట్టాలని ఉద్దాన ప్రాంత ప్రజలు కోరుతున్నారు.“`
