మాచర్లలో జరిగిన ఒక ఘటన అక్షరాలా సినిమాలను తలపించేలా ఉంది. మాజీ మునిసిపల్ ఛైర్మన్ తురకా కిషోర్ అరెస్ట్ తీరు అందరినీ షాక్కు గురిచేసింది. ఏడాది క్రితం నకిలీ సర్టిఫికెట్ల కేసులో అరెస్టై, ఇటీవలే ఏడాది జైలు జీవితం అనుభవించి విడుదలైన కిషోర్.. బయట అడుగు పెట్టిన వెంటనే మరో కేసులో తిరిగి అరెస్టవడం వివాదాస్పదమైంది.
కిషోర్ జైలు నుంచి విడుదల కాగానే, ఆయన కుటుంబ సభ్యులు ఆనందోత్సాహాలతో స్వాగతం పలకడానికి వచ్చారు. తన కన్న కూతురిని ఆలింగనం చేసుకునేలోపే, అక్కడే ఉన్న పోలీసులు మరో కేసులో ఆయనను అరెస్ట్ చేశారు. ఈ హృదయ విదారక దృశ్యాన్ని చూసిన ఆయన కుటుంబ సభ్యులు కన్నీరుమున్నీరయ్యారు. కూతురు కళ్ళముందే తండ్రిని అరెస్ట్ చేయడాన్ని చూసి తీవ్ర దుఃఖంతో విలపించారు.
తురకా కిషోర్ అరెస్ట్పై ఆయన కుటుంబ సభ్యులు తీవ్ర ఆవేదన వ్యక్తం చేస్తున్నారు. కిషోర్ వైసీపీ నాయకుడు కావడంతో, అధికార కూటమి ప్రభుత్వానికి ఆయనపై కక్ష ఉన్నట్లు వారు ఆరోపిస్తున్నారు. “స్వేచ్ఛలోకి వచ్చిన తర్వాత కుటుంబంతో కలవడానికి కూడా అవకాశం ఇవ్వకుండా వెంటనే అరెస్ట్ చేస్తారా? ఇది కక్షసాధింపు కాకపోతే ఇంకేమిటి?” అంటూ కుటుంబ సభ్యులు ప్రశ్నిస్తున్నారు.
ఈ అరెస్ట్కు సంబంధించి స్థానికంగా తీవ్ర చర్చ జరుగుతోంది. “కేసు ఉంటే విచారణ జరిపితే సరిపోదా? ఏదో చట్టవ్యతిరేకమైన పనులు చేసిన నేరస్తుల్లా అరెస్ట్ చేస్తే ఎలా?” అంటూ స్థానికులు ప్రశ్నిస్తున్నారు.
ఈ ఘటనపై రాజకీయ పార్టీలు కూడా స్పందించాయి. వైసీపీ నేతలు అధికార పార్టీ తీరును తీవ్రంగా ఖండించారు. “ప్రతిపక్ష నేతలపై దాడులు, అరెస్టులు కొనసాగిస్తే ప్రజలే దీనికి తగిన బుద్ధి చెబుతారు” అని హెచ్చరించారు.
తురకా కిషోర్ అరెస్ట్ రాజకీయంగా ప్రేరేపితమా, లేక న్యాయపరమైన అనివార్య ప్రక్రియలో భాగమా అన్నది విచారణ అనంతరం తేలనుంది. అయితే, ఆయన కన్న కూతురి ఎదుట అరెస్ట్ చేయడంపై విస్తృతంగా విమర్శలు వెల్లువెత్తుతున్నాయి. ఇది నిజమైన ‘సినిమాటిక్ అరెస్ట్’ అని చెప్పాల్సిందే!
