అమరావతిలో అభివృద్ధి పేరిట మరో సారి వివాదం చెలరేగింది. ప్రముఖ రియల్ ఎస్టేట్ సంస్థ శోభా గ్రూప్ 100 కోట్ల రూపాయలతో ఉచితంగా అతిపెద్ద గ్రంథాలయం నిర్మించనున్నట్లు ప్రకటించింది. రాష్ట్ర ప్రభుత్వం నుండి ఒక్క రూపాయి కూడా తీసుకోకుండా నిర్మాణం చేపడతామని కంపెనీ చెబుతోంది.
ప్రథమ దృష్ట్యా ఈ ప్రకటన “దాతృత్వం” లా కనిపించినా, లోతుగా చూస్తే రాజకీయ – వ్యాపార ప్రయోజనాల మేళవింపు స్పష్టంగా కనిపిస్తోంది.
చంద్రబాబు నాయుడు మళ్లీ అధికారంలోకి వచ్చిన తరువాత అమరావతిని “ప్రపంచ స్థాయి నగరంగా” తీర్చిదిద్దుతామన్న హామీలు మళ్లీ వినిపిస్తున్నాయి. “అతిపెద్ద” ఈవెంట్లు, “అతిపెద్ద” నిర్మాణాలు, “అతిపెద్ద” పెట్టుబడులు ఇవన్నీ మాటలకే పరిమితమైపోతున్నాయి.
గతంలోనూ ఇదే శబ్దంతో ప్రాజెక్టులు ప్రారంభమయ్యాయి. కానీ కాలక్రమంలో అవి వాస్తవ రూపం దాల్చకపోవడంతో ప్రజలలో అనుమానాలు పెరిగాయి.
అమరావతిపై మళ్లీ దృష్టి కేంద్రీకరించడంతో గుంటూరు, విజయవాడ నగరాల అభివృద్ధి నిష్క్రియమైపోయింది. పలు వ్యాపార కేంద్రాలు మూతపడ్డాయి, రియల్ ఎస్టేట్ మార్కెట్ పూర్తిగా కుంగిపోయింది. ప్రజలు పెట్టిన డబ్బులు నిలిచిపోయాయి. ఇలాంటి పరిస్థితుల్లో మళ్లీ రియల్ ఎస్టేట్ కంపెనీలకు “అభివృద్ధి” పేరుతో భూముల కేటాయింపులు చేయడం ప్రజల్లో ఆగ్రహాన్ని రేపుతోంది.
శోభా గ్రూప్ వంటి కంపెనీలు ఉచితంగా 100 కోట్లు పెట్టడం వెనుక ఉద్దేశ్యం ఏమిటి? ఆర్థిక ప్రయోజనాలు లేకుండా ఇంత పెద్ద పెట్టుబడి ఎవరైనా పెడతారా? ఇలాంటి దాతృత్వం వెనుక భవిష్యత్తులో విలువైన భూముల కేటాయింపులు, టెండర్లలో సడలింపులు, పన్ను రాయితీలు వంటి అంశాలు దాగి ఉంటాయనే అనుమానాలు ఉన్నాయి.
అమరావతి ప్రజలు నిజమైన అభివృద్ధిని కోరుకుంటున్నారు. భవనాల రూపంలో కాకుండా ఉద్యోగాలు, మౌలిక సదుపాయాలు, జీవన ప్రమాణాల్లో మెరుగుదల రూపంలో. కానీ పాలకులు మాత్రం “ప్రాజెక్టులు” అనే పేరుతో ప్రజల భూములను, వారి విశ్వాసాన్ని మళ్లీ మార్కెట్లో పెట్టుబడి చేసేందుకు ప్రయత్నిస్తున్నట్లు అనిపిస్తోంది.
అమరావతిలో 100 కోట్ల “ఉచిత” గ్రంథాలయం నిర్మాణం పాజిటివ్గా కనిపించినా, దాని వెనుక రాజకీయ–వ్యాపార సమీకరణాల వాసన స్పష్టంగా ఉంది.
