తెలంగాణ రాజకీయాల్లో మీడియా పాత్ర ఎప్పుడూ చర్చనీయాంశమే. కానీ, ఇటీవల కొన్ని మీడియా సంస్థలు, ముఖ్యంగా ఏబీఎన్ (ABN) వంటి ఛానళ్లు అనుసరిస్తున్న తీరు జర్నలిజం విలువలకే మచ్చ తెచ్చేలా ఉందని సామాజిక మాధ్యమాల్లో విమర్శలు వెల్లువెత్తుతున్నాయి. నిష్పాక్షికంగా వార్తలు అందించాల్సింది పోయి, ఒక పార్టీకి కొమ్ముకాస్తూ.. మరో పార్టీని టార్గెట్ చేయడంపై సామాన్య ప్రజలు సైతం విస్మయం వ్యక్తం చేస్తున్నారు.
ఇటీవల ఏబీఎన్ యాంకర్ వెంకటకృష్ణ నిర్వహించిన చర్చా కార్యక్రమాల్లో ఆయన ప్రవర్తించిన తీరుపై బీఆర్ఎస్ శ్రేణులు తీవ్రంగా మండిపడుతున్నాయి. ముఖ్యమంత్రి హోదాలో ఉండి ప్రతిపక్ష నాయకులను, ప్రత్యేకించి కేసీఆర్ గారిని ఉద్దేశించి రేవంత్ రెడ్డి వాడుతున్న భాషను సదరు యాంకర్ సమర్థించడం చర్చనీయాంశమైంది. చావాలని కోరుకుంటూ చేసే వ్యాఖ్యలను కూడా “తనదైన శైలిలో కౌంటర్ ఇచ్చారు” అని కితాబు ఇవ్వడం ఏ రకమైన జర్నలిజం అని నెటిజన్లు ప్రశ్నిస్తున్నారు. తెలంగాణ ప్రయోజనాల కోసం, ప్రభుత్వం చేస్తున్న పొరపాట్లపై కేసీఆర్ గారు గళమెత్తితే.. దాన్ని అహంకారంగా చిత్రీకరించే ప్రయత్నం చేయడం వెనుక ఉన్న కుట్ర స్పష్టంగా కనిపిస్తోందని విశ్లేషకులు భావిస్తున్నారు.
ఉద్యమ కాలం నుండి నేటి వరకు తెలంగాణ అస్తిత్వంపై, ఇక్కడి నాయకత్వంపై ఒక వర్గం మీడియా నిరంతరం విషం చిమ్ముతూనే ఉంది. అభివృద్ధిని చూపించకుండా, కేవలం రాజకీయ లబ్ధి కోసం వ్యక్తులను టార్గెట్ చేయడం వల్ల ప్రజల్లో ఆ మీడియా సంస్థల పట్ల నమ్మకం సడలిపోతోంది.
మీడియా అనేది ప్రజాస్వామ్యంలో నాలుగో స్తంభం. అది పాలకుల పక్షాన కాకుండా, ప్రజల పక్షాన ఉండాలి. కానీ, “పచ్చ మీడియా” అని పిలవబడే కొన్ని సంస్థలు ఒక పార్టీ బానిసలుగా మారి పనిచేయడం వల్ల సమాజానికి జరిగే మేలు కంటే కీడే ఎక్కువ. ఇప్పటికైనా ఇటువంటి ఏకపక్ష ధోరణిని వీడి, వాస్తవాలను వక్రీకరించకుండా చూపిస్తారని తెలంగాణ సమాజం కోరుకుంటోంది.
