తిరుపతిలో నిన్న అర్ధరాత్రి మంచు మనోజ్ అరెస్టు కావడం పెద్ద సంచలనంగా మారింది. చంద్రగిరిలో జరిగిన జల్లికట్టు వేడుకలకు ముఖ్య అతిథిగా హాజరైన ఆయన, అనంతరం లేక్ వ్యాలీ రిసార్ట్లో బస చేశారు. అయితే, రాత్రి 11 గంటల సమయంలో పెట్రోలింగ్ నిర్వహిస్తున్న పోలీసులు అక్కడికి చేరుకుని, అటవీ ప్రాంతంలో అనుమతి లేకుండా ఉండరాదని, వెంటనే ఖాళీ చేయాలని సూచించారు. ఈ నేపథ్యంలో మంచు మనోజ్, పోలీసులకు మధ్య వాగ్వాదం చోటుచేసుకోగా, చివరికి అతన్ని బకరాపేట పోలీస్ స్టేషన్కు తరలించారు.
అయితే, పోలీస్ స్టేషన్లో ఉన్నతాధికారులతో మంచు మనోజ్ ఫోన్లో మాట్లాడిన సంభాషణ వీడియో సోషల్ మీడియాలో వైరల్ అవుతోంది. ఈ వీడియోలో ఆయన, “మీ పోలీసులు సీఎం చంద్రబాబు గారు అరెస్ట్ చేయమంటే వచ్చి చేశామన్నట్లు మాట్లాడుతున్నారు. సీఎం గారికి వేరే పనేమీ లేదా? ఇలాంటి చిన్న విషయాలకు ఆయన పేరును ఎందుకు వాడుతున్నారు?” అంటూ ప్రశ్నించారు.
అలాగే, “ఇదంతా ఎవరు చేయిస్తున్నారో మీకు తెలుసు, నాకు తెలుసు. ఇక ఎందుకు దాగుడుమూతలు? నేను పోలీస్ జీప్ ఎక్కుతుంటే, మీ ఎస్ఐ, ఒక కానిస్టేబుల్ నా చెయ్యి పట్టుకుని లాగారు. నేను ఎలాంటి తప్పూ చేయకపోతే, అలా చేయాల్సిన అవసరం ఏముంది?” అంటూ మనోజ్ తన ఆవేదనను వ్యక్తం చేశారు.
ఈ ఘటనపై నెటిజన్లు, సినీ ప్రముఖులు, రాజకీయ నాయకులు భిన్న స్పందనలు వ్యక్తం చేస్తున్నారు. కొందరు మంచు మనోజ్ను సమర్థించగా, మరికొందరు పోలీసుల విధానాన్ని సమర్థిస్తున్నారు. ఈ వ్యవహారంపై అధికారిక ప్రకటన రావాల్సి ఉంది.
