మాజీ సీఎం జగన్ పార్టీ పునర్వ్యవస్థీకరణలో మరో కీలక నిర్ణయం తీసుకున్నారు. పార్టీలో కొత్త ఉత్సాహం నింపేందుకు ఆయన వ్యూహాత్మక చర్యలు చేపడుతున్నారు. ఇందులో భాగంగా తన తండ్రితో కలిసి పని చేసిన అనుభవజ్ఞుల్ని తిరిగి పార్టీలోకి ఆహ్వానిస్తున్నారు. ప్రస్తుతం బెంగళూరు కేంద్రంగా రాజకీయ సమీకరణాలు నిర్వహిస్తున్న జగన్, ఉగాది నుంచి జిల్లాల పర్యటనలు ప్రారంభించేందుకు సిద్ధమవుతున్నారు.
ఈ మార్పుల సమయంలో, పార్టీని వీడుతున్న సీనియర్ నేతల స్థానాలను కీలక నాయకులకు అప్పగించేందుకు జగన్ చర్యలు తీసుకుంటున్నారు. తాజాగా, విజయసాయిరెడ్డి పార్టీకి గుడ్బై చెప్పిన నేపథ్యంలో, ఆయన స్థానాన్ని ఓ కీలక నేత భర్తీ చేయనున్న విషయం రాజకీయ వర్గాల్లో చర్చనీయాంశంగా మారింది. వైసీపీ నెంబర్ టూ స్థానంలో ఉన్న విజయసాయిరెడ్డి, 2019 ఎన్నికల అనంతరం ఉత్తరాంధ్ర వ్యవహారాల ఇంఛార్జ్గా వ్యవహరించారు. కానీ, ఆరోపణల నేపథ్యంలో ఆ బాధ్యతల నుంచి తొలగించబడ్డారు.
2024 ఎన్నికల్లో గుంటూరు జిల్లాలో విజయసాయిరెడ్డికి బాధ్యతలు అప్పగించగా, వేమిరెడ్డి ప్రభాకర్ రెడ్డి వైసీపీని వీడటంతో ఆయన అనూహ్యంగా నెల్లూరు ఎంపీ అభ్యర్థిగా పోటీకి దిగారు. అయితే, ఎన్నికల్లో పరాజయం పాలయ్యారు. దీంతో జగన్ మరోసారి ఉత్తరాంధ్ర బాధ్యతలను విజయసాయిరెడ్డికి అప్పగించారు.
ఇప్పుడీ కీలక ప్రాంతంలో కొత్త నాయకత్వం అవసరమైన తరుణంలో, జగన్ సీనియర్ నేత బొత్సా సత్యనారాయణతో చర్చలు జరిపినట్లు సమాచారం. చివరకు, ఉత్తరాంధ్ర పార్టీ బాధ్యతలను ఫైర్ బ్రాండ్గా గుర్తింపు పొందిన పేర్ని నానికి అప్పగించాలని జగన్ నిర్ణయించినట్లు తెలుస్తోంది. ఎన్నికల ఓటమి తర్వాత పార్టీ తరఫున బలమైన స్వరం వినిపిస్తున్న నేతల్లో పేర్ని నాని ఉన్నారు. ఇటీవల బియ్యం వివాదంలోనూ ఆయన కుటుంబం కేసులను ఎదుర్కొన్న విషయం తెలిసిందే.
