నటసింహం, హిందూపురం ఎమ్మెల్యే నందమూరి బాలకృష్ణ ఇటీవల జరిగిన ‘అఖండ 2’ ప్రీ-రిలీజ్ ఈవెంట్లో చేసిన వ్యాఖ్యలు ప్రస్తుతం చర్చనీయాంశంగా మారాయి. తన వ్యక్తిగత జీవితం, వృత్తిపరమైన బాధ్యతలను ప్రస్తావిస్తూ ఆయన చేసిన ఈ కామెంట్స్ వేదికపై నవ్వులు పూయించినా, దేన్ని ఉద్దేశించి చేశారనే దానిపై అభిమానుల్లో ఆసక్తి పెరిగింది.
బాలకృష్ణ మాట్లాడుతూ… తాను నటుడిగా, ఎమ్మెల్యేగా, బసవతారకం క్యాన్సర్ ఆస్పత్రి చైర్మన్గా అనేక బాధ్యతలను సమర్థవంతంగా నిర్వర్తించగలుగుతున్నానని తెలిపారు. అయితే ఈ బిజీ షెడ్యూల్ మధ్య తన భార్య వసుంధర దేవి గురించి ప్రస్తావిస్తూ ఆయన చేసిన కామెంట్స్ ప్రత్యేక ఆకర్షణగా నిలిచాయి. “నేను ఇన్ని పనులు చేయగలుగుతున్నా… కానీ ఒక్కరే భార్య అంటూ ఉంటారు. నా భార్య వసుంధర ఎప్పుడూ నన్ను అంటిపెట్టుకునే ఉంటానని చెబుతుంటుంది” అని బాలకృష్ణ అన్నారు. “ఒక్కదాన్నైతే హత్తుకొని ఉండలేను,” అంటూ ఆయన చేసిన వ్యాఖ్యలు ఈ ప్రసంగంలో హైలైట్గా నిలిచాయి.
బాలకృష్ణ చేసిన “ఒక్కదాన్నైతే హత్తుకొని ఉండలేను” అనే వ్యాఖ్యలను పరిశీలిస్తే, ఆయన తన వృత్తిపరమైన బాధ్యతలను ఉద్దేశించి మాట్లాడినట్లుగా అర్థమవుతోంది.
‘ఒక్కదాన్నైతే హత్తుకొని ఉండలేను’ అంటే, కేవలం ఒకే ఒక్క పనికి సినిమాలకు మాత్రమే పరిమితం కావడం కట్టుబడి ఉండలేను, అనేక బాధ్యతలను నటన, రాజకీయం, సామాజిక సేవ ఒకేసారి నిర్వర్తించాల్సి ఉంటుందని, లేదా ఆ విధంగా ఉంటేనే తనకు సంతృప్తి అని పరోక్షంగా చెప్పినట్లు విశ్లేషకులు భావిస్తున్నారు.
ఆయన తన భార్య మాటలను ఉటంకించి, తనకు సినిమా జీవితంతో పాటు ప్రజా జీవితం, సామాజిక సేవలపై ఉన్న నిబద్ధతను సరదాగా చెప్పకనే చెప్పారు. ఒకే ‘దాన్ని’ హత్తుకుంటే.. మిగతా వాటిని నిర్లక్ష్యం చేయాల్సి వస్తుందనే భావన ఈ వ్యాఖ్యల వెనుక దాగి ఉంది.
ఏది ఏమైనా బాలకృష్ణ తన బిజీ షెడ్యూల్ను, దాని పట్ల తనకున్న అంకితభావాన్ని ఈ విధంగా సరదాగా, కానీ అర్థవంతంగా చెప్పడం అభిమానులను ఆకట్టుకుంది. ‘అఖండ 2’ సినిమా విజయం సాధించాలని ఈ సందర్భంగా ఆయన ఆకాంక్షించారు.
