ఆంధ్రప్రదేశ్ రాజకీయాల్లో కొత్త మలుపులు తిరుగుతున్నాయి. వైయస్సార్ కాంగ్రెస్ పార్టీని బలహీనపరచాలని కూటమి భావిస్తుండగా, మరోవైపు జగన్ మోహన్ రెడ్డి ప్రభుత్వం ఇబ్బందుల్లో పడాలని ప్రయత్నాలు సాగిస్తున్నాడు. ఇదే సమయంలో, శాసనసభ సమావేశాలకు వైసీపీ ఎమ్మెల్యేల గైర్హాజరు పెద్ద చర్చగా మారింది.
జగన్ మోహన్ రెడ్డి నిర్ణయంతో వైసీపీ ఎమ్మెల్యేలు సభలకు దూరంగా ఉంటున్నారు. సభలో మాట్లాడే సమయం ఇవ్వడం లేదని కారణం చెబుతున్నారు. కానీ, రిజిస్టర్లో సంతకం పెట్టి సభకు హాజరు కానట్టుగా వ్యవహరిస్తున్నారని ఆరోపణలు రావడం, ఎథిక్స్ కమిటీ దృష్టిని ఆకర్షించడం వైసీపీకి పెద్ద తలనొప్పిగా మారింది. అంతేకాక, హాజరుకాని ఎమ్మెల్యేలపై అనర్హత వేటు పడే అవకాశమూ ఉందని కూటమి వర్గాల మాట.
ఈ పరిస్థితుల్లో, మంత్రి నారా లోకేష్ ఆశ్చర్యపరిచే నిర్ణయం తీసుకున్నారు. అమరావతిలో జరగనున్న మెగా డీఎస్సీ నియామక పత్రాల కార్యక్రమానికి (16 వేల మందికి పైగా ఉపాధ్యాయ పోస్టులు) జగన్ మోహన్ రెడ్డిని ప్రత్యేకంగా ఆహ్వానించారు. ముఖ్యంగా పులివెందుల ఎమ్మెల్యే హోదాలోనే ఆహ్వానం పలకడం రాజకీయ వర్గాల్లో చర్చనీయాంశమైంది.
జగన్ హాజరైతే, వేదికపై సీఎం చంద్రబాబు, డిప్యూటీ సీఎం పవన్ కళ్యాణ్, మంత్రి లోకేష్‌తో పాటు ఆయన ఒకే వేదిక పంచుకోవాల్సి ఉంటుంది. ఇది జరిగితే, ఆంధ్రప్రదేశ్ రాజకీయ చరిత్రలో అరుదైన సంఘటనగా మిగిలిపోతుంది.
ఉమ్మడి ఏపీలో విభిన్న పార్టీల నేతలు ఒకే వేదికపై కలిసే దృశ్యాలు సాధారణం. రాజశేఖరరెడ్డి, చంద్రబాబు ఒకరిపై ఒకరు అసెంబ్లీలో తీవ్రమైన విమర్శలు చేసినా, ప్రభుత్వ లేదా సామాజిక కార్యక్రమాల్లో ఎంతో స్నేహపూర్వకంగా కలిసిపోయేవారు. కానీ రాష్ట్ర విభజన తర్వాత ఆ వాతావరణం పూర్తిగా కనుమరుగైంది. ముఖ్యంగా వైసీపీ ఆవిర్భావం తర్వాత సహృద్భావానికి స్థానం లేకుండా పోయింది.
2014లో అమరావతి శంకుస్థాపన వంటి కీలక కార్యక్రమాలకు కూడా జగన్ హాజరు కాలేదు. 2024లో కూటమి ప్రభుత్వం అధికారంలోకి వచ్చిన తర్వాత అమరావతి పునర్నిర్మాణ పనులకు ఆహ్వానించినా ఆయన దూరంగా ఉన్నారు. ఈసారి కూడా జగన్ రాకపోవడం ఖాయమనే అభిప్రాయం వైసీపీ వర్గాల్లో వినిపిస్తోంది.
అయితే, ఆయన వస్తే మాత్రం ఇది కూటమికి పెద్ద ప్లస్ అవుతుంది. ఎందుకంటే మెగా డీఎస్సీ పూర్తి చేయగలిగింది కూటమి ప్రభుత్వం. ఆ క్రెడిట్ మొత్తం కూటమికే వెళ్లిపోతుంది. అందుకే జగన్‌ను వేదికపైకి రప్పించే వ్యూహం కూటమి వేసినట్లు కనిపిస్తోంది.
చంద్రబాబు, పవన్, లోకేష్‌తో కలిసి జగన్ ఒకే వేదిక పంచుకోవడం నిజంగానే జరిగితే, అది ఆంధ్రప్రదేశ్ రాజకీయాల్లో ఒక చారిత్రక క్షణం అవుతుంది. కానీ జగన్ వస్తారా? రారా? అనేది ఇప్పుడు రాష్ట్ర రాజకీయాల్లో ఆసక్తికర ప్రశ్నగా మారింది.
