తెలంగాణ రవాణా శాఖ మంత్రి పొన్నం ప్రభాకర్ మీడియా ప్రతినిధులపై ఆగ్రహం వ్యక్తం చేసిన వీడియో సోషల్ మీడియాలో వైరల్‌గా మారింది. కరీంనగర్‌లో మంగళవారం జరిగిన విలేకరుల సమావేశంలో ఆయన మీడియా ప్రతినిధులపై తీవ్రంగా స్పందించారు. “ఎవరయ్యా సెల్‌ఫోన్ మాట్లాడతడు? క్రాక్ ఫెలో.. ఎవడా హౌలా గాడు.. ఎవడయ్యా వాడు?” అంటూ ఆయన ఆగ్రహం వ్యక్తం చేశారు. ఈ ఘటనపై మీడియా ప్రతినిధులు నిరసన వ్యక్తం చేశారు.
సమావేశంలో పొన్నం ప్రభాకర్ భారత రాష్ట్ర సమితి (BRS), భారతీయ జనతా పార్టీ (BJP)పై తీవ్ర విమర్శలు గుప్పించారు. కులగణనపై ఈ రెండు పార్టీలు చేస్తున్న ఆరోపణలు అన్యాయమని, బలహీన వర్గాలకు న్యాయం చేయగలిగేది కేవలం కాంగ్రెస్ పార్టీ మాత్రమేనని ఆయన స్పష్టం చేశారు. మైనార్టీలను బీసీలలో చేర్చలేదని తెలిపారు. కుల గణన దరఖాస్తులను BRS అధినేత, మాజీ సీఎం కేసీఆర్, మాజీ మంత్రులు కేటీఆర్, హరీష్ రావులకు పంపినట్లు పేర్కొన్నారు.
“కులగణనలో ముందుగా మీరు పాల్గొనండి. ఆ తర్వాత మాట్లాడండి. బలహీన వర్గాలకు న్యాయం జరగడం మీకు ఇష్టం లేదా?” అంటూ ఆయన ప్రశ్నించారు. BRS, BJP నాయకులకు చిత్తశుద్ధి లేదని, చేతకాకపోతే నిశ్శబ్దంగా ఉండాలని సూచించారు. కుల గణనపై BJP నాయకులు కుట్ర చేస్తున్నారని ఆరోపించారు. అయినప్పటికీ, వారి నుంచి సలహాలు, సూచనలు తీసుకోవడానికి కాంగ్రెస్ సిద్ధంగా ఉందని తెలిపారు.
కేంద్ర మంత్రి బండి సంజయ్‌కి సవాల్ విసిరిన పొన్నం ప్రభాకర్, “దమ్ముంటే దేశవ్యాప్తంగా కులగణన చేపట్టేలా కేంద్రాన్ని ఒప్పించండి” అని డిమాండ్ చేశారు. BJP రాష్ట్ర అధ్యక్ష పదవి నుంచి బండి సంజయ్‌ను తొలగించడంతో బీసీ సమాజం బాధపడిందని వ్యాఖ్యానించారు. ఎమ్మెల్సీ కవిత గురించి మాట్లాడుతూ, “ఆమె లిక్కర్ కేసుతో నినాదం అయ్యింది. ఇప్పుడు బీసీ నినాదాన్ని ఎత్తుకుంది. కవితకు అప్పుడప్పుడు జాగృతి గుర్తుకు వస్తుంది, లేదంటే బతుకమ్మను నెత్తిపై ఎత్తుకుంటుంది” అని ఎద్దేవా చేశారు. అయితే, ఆమెను విమర్శించాలనే ఉద్దేశం తనకు లేదని, కానీ ఆమె వ్యాఖ్యలు ఇబ్బంది కలిగిస్తున్నాయని వివరించారు.
కాంగ్రెస్ పార్టీ అధికారంలో ఉన్నప్పుడు బీసీలకు న్యాయం జరిగిందని, రాష్ట్ర అధ్యక్ష పదవి సహా అనేక పదవులను బీసీలకు కేటాయించినట్లు చెప్పారు. “ఇతర పార్టీలు అలాంటి న్యాయం చేయగలవా?” అంటూ పొన్నం ప్రభాకర్ సవాల్ విసిరారు.
అయితే, ఈ సమావేశంలో పొన్నం ప్రభాకర్ మీడియా ప్రతినిధులపై ఆగ్రహంతో మాట్లాడటం, చిందులు తొక్కడం చర్చనీయాంశంగా మారింది. ఈ వీడియో గులాబీ పార్టీ అనుకూల సోషల్ మీడియా గ్రూపుల్లో వైరల్‌గా మారింది. దీనిపై సామాజిక మాధ్యమాల్లో విభిన్న అభిప్రాయాలు వ్యక్తమవుతున్నాయి.
