ఆంధ్రప్రదేశ్లో ప్రతిపక్ష నేత వైఎస్ జగన్మోహన్ రెడ్డి జిల్లాల పర్యటనలపై రాష్ట్ర ప్రభుత్వం విధిస్తున్న ఆంక్షలు తీవ్ర రాజకీయ చర్చకు దారితీశాయి. ఇది ప్రభుత్వ భయానికి నిదర్శనమా లేక నియంతృత్వ చర్యనా అనే ప్రశ్నలు తలెత్తుతున్నాయి.
వైఎస్ఆర్సీపీ వర్గాల ప్రకారం, వైఎస్ జగన్ ఏ ఊరు వెళ్లాలన్నా ప్రభుత్వం అడుగడుగునా ఆంక్షలు విధిస్తోంది. ఇటీవల పల్నాడు పర్యటనలోనూ, నెల్లూరులో మాజీ మంత్రి గోవర్థన్ రెడ్డిని పరామర్శించేందుకు వెళ్లినా నిబంధనల పేరుతో అడ్డుకున్నారని వారు ఆరోపిస్తున్నారు. ప్రతిపక్ష నేత పర్యటనలపై ఇంతటి కట్టడి ప్రభుత్వం ప్రజల వ్యతిరేకతకు భయపడుతుందనడానికి నిదర్శనంగా విశ్లేషకులు అభిప్రాయపడుతున్నారు.
ప్రజలకు “సూపర్ సిక్స్” హామీలు ఇచ్చి అధికారంలోకి వచ్చిన ప్రభుత్వం, పెన్షన్ల పెంపు మినహా మరే హామీని అమలు చేయలేదన్న విమర్శలున్నాయి. రైతులు, యువత, విద్యార్థులు, మహిళలకు ఇచ్చిన హామీలు నెరవేర్చకపోవడం, వ్యవసాయ ఉత్పత్తులకు మద్దతు ధర లేకపోవడం వంటి సమస్యలు ప్రభుత్వ వ్యతిరేకతను మరింత పెంచుతున్నాయి.
రాష్ట్రంలో “రెడ్ బుక్ రాజ్యాంగం” అమలవుతోందని, సోషల్ మీడియాలో పోస్టులు పెట్టిన, ప్రభుత్వాన్ని ప్రశ్నించిన వారిని రాత్రికి రాత్రి అరెస్టులు చేసి చిత్రహింసలకు గురిచేస్తున్నారని ఆరోపణలు వెల్లువెత్తుతున్నాయి. పోలీసుల తీరును హైకోర్టు కూడా పలుమార్లు తప్పుబట్టడం గమనార్హం.
గతంలో వైఎస్ జగన్ అధికారంలో ఉన్నప్పుడు చంద్రబాబు, లోకేష్ పర్యటనలపై ఇన్ని ఆంక్షలు లేవని వైఎస్ఆర్సీపీ గుర్తుచేస్తోంది. ప్రజాస్వామ్యంలో ప్రభుత్వాన్ని నిలదీసే హక్కు ప్రతిపక్షానికి ఉంటుందని, ఈ హక్కును కాలరాయడం నియంతృత్వానికి దారితీస్తుందని విశ్లేషకులు హెచ్చరిస్తున్నారు. ఎవరెన్ని అడ్డుపుల్లలు వేసినా, ఆంక్షలు విధించినా ప్రజల్లోకి వెళ్తామని వైఎస్ జగన్, ఆయన కార్యకర్తలు స్పష్టం చేస్తున్నారు. ఈ పరిణామాలు రాబోయే రోజుల్లో ఆంధ్రప్రదేశ్ రాజకీయాల్లో మరింత ఉద్రిక్తతకు దారితీసే అవకాశం ఉంది.
