ఆంధ్రప్రదేశ్ ముఖ్యమంత్రి చంద్రబాబు నాయుడు ఇటీవల రైతులపై చేసిన వ్యాఖ్యలు తీవ్ర విమర్శలకు గురవుతున్నాయి. ఎరువుల కొరతతో ఇబ్బందులు పడుతున్న రైతులు యూరియా, డీఏపీ కోసం ఆందోళన వ్యక్తం చేస్తుంటే, వారిని “జైలుకు పంపిస్తా.. ఖబర్ధార్” అంటూ బెదిరించడం రైతాంగాన్ని అవమానించే విధంగానే భావించబడుతోంది.
రైతులు అడిగేది కేవలం ఎరువులు మాత్రమే కాదు, గౌరవం కూడా. పంటలకు గిట్టుబాటు ధరలు ఇవ్వడంలో, సమయానికి ఎరువులు అందించడంలో ప్రభుత్వం విఫలమవుతోందని విమర్శలు వినిపిస్తున్నాయి. ఇలాంటి పరిస్థితుల్లో రైతుల ఆవేదనను అణచివేయడం ప్రజాస్వామ్య విరుద్ధమని సంఘాలు మండిపడుతున్నాయి.
దేశం వెన్నెముక అయిన రైతులను “దండుపాళ్యం బ్యాచ్”, “వైసీపీ కార్యకర్తలు” అంటూ తక్కువ చేసి మాట్లాడటం అనవసరమని పలువురు నాయకులు అభిప్రాయపడుతున్నారు. ఈ ధోరణి కొనసాగితే, రైతులు ఉద్యమ పంథా ఎంచుకోవాల్సి వస్తుందని హెచ్చరిస్తున్నారు.
ప్రభుత్వం వెంటనే ఎరువుల సమస్యను పరిష్కరించి, రైతుల గౌరవాన్ని కాపాడే విధంగా వ్యవహరించాలి. లేకుంటే, రైతుల శాపం తప్పదనే చరిత్ర మరలా పునరావృతమవుతుందనే హెచ్చరికలు వినిపిస్తున్నాయి.
