హైదరాబాద్, జూబ్లీహిల్స్ ప్రాంతంలో హీరో బెల్లంకొండ శ్రీనివాస్ కారుతో హల్చల్ సృష్టించిన సంఘటన ఆలస్యంగా వెలుగులోకి వచ్చింది. జర్నలిస్ట్ కాలనీ వద్ద రాంగ్ రూట్‌లో కారు నడుపుతూ వచ్చిన బెల్లంకొండ శ్రీనివాస్, అడ్డుగా ఉన్న ట్రాఫిక్ కానిస్టేబుల్ పైకి దూసుకొచ్చినట్లు సమాచారం.
వివరాల్లోకి వెళితే, జూబ్లీహిల్స్ జర్నలిస్ట్ కాలనీ సమీపంలో ట్రాఫిక్ విధులు నిర్వహిస్తున్న ఓ కానిస్టేబుల్, రాంగ్ రూట్‌లో వేగంగా వస్తున్న కారును గమనించారు. ఆ కారును ఆపే ప్రయత్నం చేయగా, కారు నేరుగా కానిస్టేబుల్ పైకి దూసుకొచ్చింది. అప్రమత్తమైన కానిస్టేబుల్ తప్పుకోవడంతో పెను ప్రమాదం తప్పింది.
వెంటనే తేరుకున్న కానిస్టేబుల్ కారును ఆపి, డ్రైవింగ్ చేస్తున్న వ్యక్తిని నిలదీశారు. కారులో ఉన్నది సినీ హీరో బెల్లంకొండ శ్రీనివాస్ అని గుర్తించారు. రాంగ్ రూట్‌లో ఎందుకు వస్తున్నారని, ట్రాఫిక్ నిబంధనలు ఎందుకు ఉల్లంఘిస్తున్నారని కానిస్టేబుల్ ప్రశ్నించారు. ఈ క్రమంలో ఇరువురి మధ్య వాగ్వాదం జరిగినట్లు తెలిసింది.
ట్రాఫిక్ కానిస్టేబుల్ గట్టిగా నిలదీయడంతో, బెల్లంకొండ శ్రీనివాస్ కారును వెనక్కి తీసుకుని అక్కడ నుండి వెళ్లిపోయినట్లు స్థానికులు, ప్రత్యక్ష సాక్షులు తెలిపారు. ఈ సంఘటనపై ట్రాఫిక్ పోలీసులు కేసు నమోదు చేశారా లేదా అనే దానిపై స్పష్టత లేదు. అయితే, ఒక సినీ సెలబ్రిటీ అయి ఉండి బాధ్యతారాహిత్యంగా రాంగ్ రూట్‌లో కారు నడపడం, పైగా విధి నిర్వహణలో ఉన్న పోలీసు కానిస్టేబుల్‌తో దురుసుగా ప్రవర్తించడంపై విమర్శలు వెల్లువెత్తుతున్నాయి. ట్రాఫిక్ నిబంధనలు అందరికీ సమానమేనని, సెలబ్రిటీలు కూడా వాటిని పాటించాలని నెటిజన్లు అభిప్రాయపడుతున్నారు.
జూబ్లీహిల్స్‌లో కారుతో హీరో బెల్లంకొండ శ్రీనివాస్ హల్చల్
జర్నలిస్ట్ కాలనీ వద్ద రాంగ్ రూట్‌లో కారుతో ట్రాఫిక్ కానిస్టేబుల్ పైకి దూసుకొచ్చిన బెల్లంకొండ శ్రీనివాస్
ట్రాఫిక్ కానిస్టేబుల్ కారును ఆపి నిలదీయటంతో వెళ్లిపోయిన బెల్లంకొండ శ్రీనివాస్ pic.twitter.com/iyOeNUaWol
— Telugu Scribe (@TeluguScribe) May 13, 2025
