టీవీ5 అంటేనే ఘాటైన రాజకీయ చర్చలు, ఎదురుదాడి ప్రశ్నలు. సాంబశివరావు గారి స్టూడియోలోకి వెళ్తే, రాజకీయ ప్రత్యర్థులు కూడా నోరు మూసుకుని కూర్చునేంత కఠినమైన వాదనలు చూశాం. పాలకుల లోపాలను ఎత్తిచూపే సీరియస్ పాలిటిక్స్కు సాంబ గారు పర్యాయపదం.
అయితే, నిన్న దేశ రాజకీయాలనే కాదు, ప్రపంచ క్రికెట్ చరిత్రను కూడా కదిలించే ఒక అద్భుత ఘట్టం ఆవిష్కృతమైంది. ఎప్పుడూ లేని విధంగా, రాజకీయాలపై ఏ ఒక్క చిన్న టాపిక్ కూడా దొరకకపోయేసరికి, సాంబ గారు తనలో దాగి ఉన్న క్రికెట్ కోచింగ్ నైపుణ్యాన్ని బయటపెట్టారు. అప్పటిదాకా రాజకీయ వ్యూహాలపై బౌన్సర్లు వేసిన ఆయన, ఒక్కసారిగా క్రికెట్ పిచ్పైకి దిగిపోయారు.
ఆయన వాక్ చాతుర్యంతో “పిచ్ దూరం 22 గజాలు” అని చెబుతున్నప్పుడు, అప్పటిదాకా ఆ గజాలు వ్యవసాయానికి సంబంధించిన కొలతలని భావించిన యువత అంతా విస్తుపోయారు. సిక్సులు ఎలా కొట్టాలో వివరించిన తీరు, యువరాజ్ సింగ్, సెహ్వాగ్ లాంటి దిగ్గజాలు కూడా తమ స్టైల్ మార్చుకోవాలన్నంత స్థాయిలో ఉంది. “బౌండరీ ఎంత దూరం ఉంటుంది?” అని ఆయన చెప్పినప్పుడు, క్రికెట్ చరిత్రను మరచిపోయిన వారంతా వెంటనే గూగుల్లో శోధించడం మొదలుపెట్టారు.
“ఎల్.బి.డబ్ల్యూ” అంటే ఏంటి, “రన్ అవుట్” ఎలా అవుతారో ఆయన చేసిన విశ్లేషణ… ఏ ఐఐఎం ప్రొఫెసర్కు తక్కువ కాదు. ఒకప్పుడు సచిన్ ఫోర్లు, యువరాజ్ సిక్సులు ఎలా కొట్టేవారో ఆయన వర్ణించిన తీరు చూసి, ఆ ఆటగాళ్లు కూడా “అవును కదా, మేము ఇలాగే కొట్టామా?” అని ఆశ్చర్యపోయి ఉంటారు. సీరియస్ పాలిటిక్స్కు అలవాటుపడిన సాంబ గారి నోటివెంట క్రికెట్ విశ్లేషణ విన్న సోషల్ మీడియా జనాలకు పండగ వాతావరణం నెలకొంది.
“రాజకీయాలపై విసురుగా ఉండే వ్యక్తి నోటివెంట క్రికెట్ విశ్లేషణ ఏంట్రా నాయనా!” అంటూ నెటిజన్లు కామెంట్ల వర్షం కురిపించారు. ఏదేమైనా, సాంబ గారి ఈ కొత్త అవతారం క్రికెట్కు కొత్త వెలుగునిచ్చింది అనడంలో సందేహం లేదు. ఇకపై, బౌలింగ్ ఎలా చేయాలో తెలియక తలలు పట్టుకుంటున్న బౌలర్లు, సిక్సులు ఎలా కొట్టాలో తెలియక అల్లాడుతున్న బ్యాట్స్మెన్, క్రికెట్ కోచ్లను కాకుండా, టీవీ5 స్టూడియోకి వెళ్తే సరిపోతుంది. రాజకీయ ప్రత్యర్థులను ఎలా ఎదుర్కోవాలో చెప్పిన సాంబ గారు , క్రికెట్ ప్రత్యర్థులను కూడా ఎలా ఎదుర్కోవాలో చెబుతారని క్రికెట్ ప్రపంచం ఆశగా ఎదురుచూస్తోంది.
