2024 ఎన్నికలకు టీడీపీ-జనసేన-బీజేపీ పొత్తుతో వెళ్లాయి. అదే సమయంలో నాగబాబు తెరవెనక ప్రయత్నాలు చేసినా అనకాపల్లి ఎంపీ సీటును పొత్తు వల్ల దక్కించుకోలేకపోయాడు. అసెంబ్లీ సీటు కోసం ప్రయత్నించినా సాధ్యంకాలేదు. ఏపీ ఎన్నికల ఫలితాలు వెలువడ్డాక నామినేటెడ్ పదవిపై ఆశలు పెంచుకున్నారు. రాజ్యసభ అనుకున్నారు. టీటీడీ చైర్మన్ పదవి మెగా బ్రదర్‌దేనంటూ ప్రచారం సాగింది. కానీ చంద్రబాబు ఇవ్వలేకపోయాడు. ఖాళీగా ఉన్న మూడు రాజ్యసభ స్థానాల్లో ఒకటి నాగబాబుకు దక్కవచ్చని అప్పట్లో చర్చ జరిగింది. ఇది జరగలేదు.
నాగబాబుకు కాబోయే మంత్రి పదవి వద్దంటూ సోషల్ మీడియాలో జరుగుతున్న ప్రచారం వెనుక ప్రస్తుత మంత్రి నారా లోకేష్ హస్తం ఉందని, ఆయనపై ప్రతీకారంగా టీడీపీ అనుకూల సామాజిక మాధ్యమాల ద్వారా ఈ దందా సాగిస్తున్నారనే అనుమానాలు వ్యక్తమవుతున్నాయి. చంద్రబాబు ఎన్నికల సమయంలో పవన్‌కు అనుకూలంగా నారా లోకేష్‌ను వదులుకున్నారు. తీరా ఎన్నికల తర్వాత లోకేశ్ మంత్రి అయ్యాడు, కానీ ఆయనకు, జన సేనానికి మధ్య విభేదాలు అలాగే ఉన్నాయి.
మరోవైపు ఈ కథనాల ఆధారంగా నాగబాబుకు టీటీడీ చైర్మన్ సహా ఒక్క పదవి కూడా దక్కకపోవడానికి చినబాబు నారా లోకేష్ కారణమని జనసేనలో చర్చ జరుగుతోంది. గతంలో లోకేష్ ను ట్రోల్ చేసిన నాగబాబును ఇప్పుడు లోకేష్ టీం అభాసుపాలు చేస్తోందని అంటున్నారు.. ఏది ఏమైనా మహాకూటమి ప్రభుత్వంలో భాగమైనా.. టీడీపీ, జనసేన మధ్య చాలా ఏళ్లుగా సోషల్ మీడియా వార్ నడుస్తుండగా రానున్న రోజుల్లో మరింత ముదిరే అవకాశాలు కనిపిస్తున్నాయి.
