వైఎస్ భారతిపై అసభ్య వ్యాఖ్యలు చేసిన ఐటీడీపీ కార్యకర్త చేబ్రోలు కిరణ్ వ్యవహారంపై తెలుగుదేశం పార్టీ (టీడీపీ) అధిష్ఠానం తీవ్రంగా స్పందించింది. మహిళలపై అనుచిత వ్యాఖ్యలు చేసినవారికి పార్టీలో స్థానం లేదని స్పష్టం చేస్తూ, కిరణ్ను తక్షణమే పార్టీ నుంచి సస్పెండ్ చేసింది. అంతేకాక, ఆయనపై క్రిమినల్ కేసు నమోదు చేసి వెంటనే అరెస్ట్ చేయాలంటూ పోలీసులకు ఆదేశాలు జారీ చేసింది.
టీడీపీ ఆదేశాల మేరకు గుంటూరు పోలీసులు త్వరితగతిన స్పందించి, చేబ్రోలు కిరణ్పై కేసు నమోదు చేశారు. ప్రస్తుతం కిరణ్ను అరెస్టు చేసేందుకు పోలీసులు ఏర్పాట్లు పూర్తి చేశారు.
ఈ అంశంపై స్పందించిన కిరణ్, “క్షణికావేశంలోనే అలాంటి వ్యాఖ్యలు చేశాను. నా మాటల వల్ల ఎవరికైనా గాయం జరిగి ఉంటే క్షమించండి” అని పేర్కొన్నారు. అయితే టీడీపీ అధిష్టానం మాత్రం ఈ వివరణను సరిపోదని తేల్చి చెప్పింది. మహిళల పట్ల గౌరవం లేని ప్రవర్తనపై ఎలాంటి సహనమూ ఉండదని స్పష్టం చేసింది.
ఈ ఘటనతో పార్టీ శ్రేణులకు గట్టి సందేశం వెళ్లినట్టు రాజకీయ విశ్లేషకులు పేర్కొంటున్నారు. మహిళలపై అనుచితంగా ప్రవర్తిస్తే ఎవరైనా సరే కఠిన చర్యలు తప్పవని టీడీపీ హెచ్చరించింది. కిరణ్ అరెస్ట్ నేపథ్యంలో ఈ వ్యవహారం రాష్ట్ర రాజకీయాల్లో చర్చనీయాంశంగా మారింది.
