రాష్ట్రంలో సంచలనం సృష్టిస్తున్న కల్తీ లిక్కర్ దందాపై ABN చానెల్ లో జరిగిన చర్చా కార్యక్రమంలో ప్రముఖ జర్నలిస్ట్ ఏబీఎన్ వెంకటకృష్ణ ఇచ్చిన తీర్పు రాష్ట్ర రాజకీయాల్లో ప్రకంపనలు సృష్టిస్తోంది. ఈ మొత్తం ఉదంతం కూటమి ప్రభుత్వంలో తెలుగుదేశం పార్టీ (టీడీపీ) నేతలు చేసిన తప్పేనంటూ ఆగ్రహం వ్యక్తం చేసిన వెంకటకృష్ణ… ఈ విషయాన్ని 16 నెలలు దాచిపెట్టడం వలన మచ్చ కేవలం టీడీపీకి మాత్రమే కాక.. కూటమి మొత్తానికే అంటుకుందని స్పష్టం చేశారు.
ఈ వాదోపవాదంలో బీజేపీ, టీడీపీ ప్రతినిధులు ఒకరిపై ఒకరు తీవ్ర ఆరోపణలు చేసుకున్నారు. బీజేపీ ప్రతినిధి మాట్లాడుతూ “ఈ కంపు కూటమిది కాదు. ఈ నకిలీ లిక్కర్ దందాలో టీడీపీ నేతల పాత్ర స్పష్టంగా ఉంది. కాబట్టి ఈ మచ్చ కేవలం టీడీపీది మాత్రమే,” అని ఖండించారు. ఈ వ్యవహారం బీజేపీ , జనసేనకు ఏ మాత్రం సంబంధం లేదని తేల్చి చెప్పారు.
దీనికి బదులిచ్చిన టీడీపీ ప్రతినిధి “వ్యవస్థలో జరిగిన తప్పును ఒక్క పార్టీకే అంటగట్టడం సరికాదు. కంపు ఒక్క టీడీపీది కాదు, కూటమిలో భాగమైనందున ఇది కూటమిది కూడా,” అంటూ వాదించారు.
ఈ వాదనల మధ్య, ‘నకిలీ లిక్కర్ దందాలో టీడీపీ నేతలు చేసింది ముమ్మాటికీ తప్పే,’ అంటూ వెంకటకృష్ణగారు ఆగ్రహం వ్యక్తం చేశారు. ఇది కేవలం టీడీపీ నేతల నిర్లక్ష్యమే అయినా, దీన్ని దాచిపెట్టేందుకు ప్రయత్నించడం, వ్యవస్థను తప్పుదారి పట్టించడం పెద్ద పొరపాటని ఆయన స్పష్టం చేశారు.
ఈ చర్చలో సుదీర్ఘంగా ఆలోచించిన అనంతరం, ‘పెదరాయుడు’ వెంకటకృష్ణ కీలక తీర్పునిచ్చారు. “నాయకుల తప్పులు, నేరాల గురించి మాట్లాడేటప్పుడు వాటిని సరిదిద్దే బాధ్యత వ్యవస్థపై ఉంటుంది. ఇక్కడ ఈ నకిలీ లిక్కర్ దందా వ్యవహారాన్ని దాదాపు 16 నెలల పాటు బయటకు రాకుండా దాచిపెట్టారు. ఈ విషయాన్ని బయటి ప్రపంచానికి తెలియకుండా, కూటమిలో ఉన్న పెద్దల దృష్టికి వెళ్లకుండా కప్పిపుచ్చే ప్రయత్నం జరిగింది,” అని ఆయన పేర్కొన్నారు.
అందువలన, “కేవలం తప్పు చేసిన నేతలపై మాత్రమే కాక, ఆ తప్పును ఇంతకాలం దాచిపెట్టినందున, ఈ కల్తీ లిక్కర్ కంపు మచ్చ కూటమి ప్రభుత్వానికి కూడా అంటుకుంది,” అని ఆయన గంభీరంగా తీర్పునిచ్చారు. తప్పులను దాచిపెట్టే ధోరణిపై వెంకటకృష్ణ చేసిన వ్యాఖ్యలు రాజకీయ నాయకులకు, ప్రభుత్వానికి ఒక హెచ్చరికగా నిలిచాయని పరిశీలకులు భావిస్తున్నారు.
