ఆంధ్రప్రదేశ్ రాజకీయాలు మరోసారి తీవ్ర ఉద్రిక్తతకు లోనయ్యాయి. ప్రతిపక్ష నేత, వైఎస్సార్ కాంగ్రెస్ పార్టీ (వైసీపీ) అధ్యక్షులు వైఎస్ జగన్ మోహన్ రెడ్డిని మావోయిస్టుల తరహాలో అదుపులోకి తీసుకోవాలని, లేదంటే ‘ఎన్కౌంటర్ చేసి పడేయాలి’ అంటూ తెలుగుదేశం పార్టీ (టీడీపీ) అనుకూల విశ్లేషకుడు అడుసుమిల్లి శ్రీనివాస్ చేసిన వ్యాఖ్యలు రాష్ట్రంలో పెను దుమారం సృష్టిస్తున్నాయి. ఒక లైవ్ టీవీ చర్చా కార్యక్రమంలో ఆయన ఈ వ్యాఖ్యలు చేయడం రాజకీయ పరిశీలకులతో పాటు సామాన్య ప్రజానీకాన్ని కూడా దిగ్భ్రాంతికి గురిచేసింది.
టీడీపీకి అనుకూలంగా తరచూ టీవీ చర్చల్లో పాల్గొనే అడుసుమిల్లి శ్రీనివాస్, ప్రతిపక్ష నేత వైఎస్ జగన్ను లక్ష్యంగా చేసుకుని ఈ అత్యంత వివాదాస్పద వ్యాఖ్యలు చేశారు. “మావోయిస్టుల లాగే కుదిరితే వైసీపీ అధ్యక్షులు ఏపీ ప్రతిపక్షనేత వైఎస్ జగన్ ను అదుపులోకి తీసుకోవాలి.. లేకపోతే ఎన్కౌంటర్ చేసి పడేయాలి” అని ఆయన చేసిన వ్యాఖ్యలు రాజకీయ వర్గాల్లో ప్రకంపనలు సృష్టించాయి. ప్రజాస్వామ్య వ్యవస్థలో, ముఖ్యంగా ఒక ప్రధాన ప్రతిపక్ష నాయకుడిపై బహిరంగంగా ఇలాంటి హింసాత్మక వ్యాఖ్యలు చేయడంపై తీవ్ర విమర్శలు వెల్లువెత్తుతున్నాయి.
ఈ వ్యాఖ్యలపై వైఎస్సార్ కాంగ్రెస్ పార్టీ (వైసీపీ) శ్రేణులు, నేతలు తీవ్ర స్థాయిలో మండిపడుతున్నారు. ఒక ప్రతిపక్ష నేతను ఎన్కౌంటర్ చేయాలని బహిరంగంగా పిలుపునివ్వడం ‘దారుణం’ గా, ‘ఉన్మాదం’ గా వైసీపీ నాయకులు అభివర్ణిస్తున్నారు.
https://x.com/DrPradeepChinta/status/1991761353510646091?s=20
