చంద్రబాబు నాయుడుపై నమోదైన కేసులు ఒక్కొక్కటిగా కొట్టివేయబడుతుండటం రాజకీయంగా పెద్ద చర్చకు దారి తీసింది. అధికారంలోకి వచ్చిన వెంటనే కేసులు మూసివేయించుకోవచ్చు అన్న వాస్తవాన్ని మరోసారి ఈ పరిణామం స్పష్టం చేసింది. టీడీపీ నేతలు రాజకీయ వేధింపులనే కారణంగా చూపుతుంటే, వైసీపీ నేతలు మాత్రం అధికార దుర్వినియోగమే జరిగిందని ఆరోపిస్తున్నారు.
అయితే అసలు ప్రశ్న.. ఇందులో వైసీపీ తప్పు లేదా? అనే దానిపైనే దృష్టి వెళ్లాలి. వైసీపీ హయాంలో డిప్యుటేషన్పై తీసుకొచ్చిన అధికారులు ఫిర్యాదులు చేసినప్పటికీ, ప్రభుత్వం మారగానే అవే ఫిర్యాదులను వెనక్కి తీసుకున్నారు. దీని వల్ల కేసులు బలహీనపడి కొట్టివేతకు దారి తీశాయి.
దీంతో స్పష్టమయ్యేది ఏమిటంటే, అధికారంలో ఉన్నప్పుడు నమ్మకమైన, ధైర్యంగా నిలబడగల అధికారులను ఎంపిక చేసుకోకపోవడమే వైసీపీ చేసిన ప్రధాన వ్యూహ లోపం. రాజకీయ పోరాటం కేవలం కేసులపైనే ఆధారపడితే, ప్రభుత్వం మారిన వెంటనే పరిస్థితి తిరగబడటం అనివార్యం. చంద్రబాబుపై కేసుల ముగింపు కంటే, ఇది వైసీపీకి ఒక గట్టి రాజకీయ పాఠం.
