తెలుగుదేశం పార్టీ భవిష్యత్ నాయకత్వంపై రాష్ట్ర రాజకీయ వర్గాల్లో ఆసక్తికర చర్చ జరుగుతోంది. ముఖ్యంగా నారా లోకేష్‌కు త్వరలోనే కీలక పదవి దక్కనుందా? అనే సందేహాలు పార్టీ శ్రేణులు, రాజకీయ విశ్లేషకుల మధ్య ఉత్కంఠన పెంచుతున్నాయి. టీడీపీ వర్కింగ్ ప్రెసిడెంట్ పదవి ఇవ్వాలా? లేక మరింత పెద్ద స్థాయిలో జాతీయ అధ్యక్ష బాధ్యతలకే పంపించాలా? అనే అంశంపై ఇప్పటికే ఊహాగానాలు ఊపందుకున్నాయి.
మహానాడు సందర్భంగా పార్టీ తరఫున లోకేష్‌కు ప్రమోషన్ ప్రకటిస్తారనే వార్తలు ఊదెత్తగా చివరకు ఆ ప్రకటన వెలువడకపోవడం పార్టీ శ్రేణుల్లో నిరాశ కలిగించింది. రాష్ట్రం నలుమూలల నుంచి వచ్చిన తీర్మానాల్లో కూడా లోకేష్‌కు పెద్ద పదవి అప్పగించాలనే డిమాండ్ స్పష్టంగా కనిపించింది. అయితే చంద్రబాబు ఆ నిర్ణయం తీసుకోవడంలో తనదైన శైలిలో ఆచితూచి వ్యవహరించినట్లు తెలుస్తోంది.
ఇటీవల ఓ టీవీ ఛానల్‌కు ఇచ్చిన ఇంటర్వ్యూలో చంద్రబాబు సంచలన వ్యాఖ్యలు చేశారు. ‘‘లోకేష్‌కు సీఎం పదవి ఎప్పుడు?’’ అన్న ప్రశ్నకు స్పందిస్తూ – ఈ దిశగా ఇంకా సమయం ఉందని, లోకేష్ తన ముద్రను ఖచ్చితంగా చాటుకోవాల్సిన అవసరం ఉందని పేర్కొన్నారు. కృషి చేస్తే లక్ష్యం సాధ్యమేనని చంద్రబాబు స్పష్టం చేశారు. ఇలా నేరుగా ప్రకటించకపోయినా భవిష్యత్‌లో ఆ బాధ్యతలు లోకేష్ చేతిలోకి రావొచ్చన్న సంకేతాలు ఇచ్చారు.
లోకేష్ విషయమై గతంలో టీడీపీ లోపలే కొంత విమర్శా స్వరం వినిపించేది. నాయకత్వంపై అనుమానాలు, ప్రజల వద్ద సరైన గుర్తింపు లేదన్న వ్యాఖ్యలు ఎక్కువగా వచ్చాయి. అయితే ఈ మధ్య కాలంలో లోకేష్ తన శ్రమ, ప్రజలతో సన్నిహిత సంబంధం ద్వారా ఈ అపనమ్మకాలను తుడిచిపెట్టేశారనే అభిప్రాయం వినిపిస్తోంది. ప్రత్యేకించి యువతలో లోకేష్‌కు బలం పెరుగుతోంది.
మహానాడు వేదికగా లోకేష్‌కు బాధ్యతలు అప్పగించాలన్న డిమాండ్ భారీగా వినిపించినా చంద్రబాబు ఇంకా సమయం లేదన్న అభిప్రాయంతో వెనక్కి తగ్గినట్లు తెలుస్తోంది. పార్టీలో అందరి అంగీకారంతోనే ఈ నిర్ణయం తీసుకోవాలన్నది చంద్రబాబు వ్యూహం. కుటుంబం నుండి కూడా ఎలాంటి అభ్యంతరాలు లేవు. పైగా లోకేష్ చుట్టూ ఇప్పటికే ఓ నూతన టీమ్ సిద్ధమవుతోంది.
ఈ పరిణామాల మధ్య చంద్రబాబు వ్యాఖ్యలు లోకేష్‌కు పార్టీపై మరింత స్పష్టమైన భవిష్యత్ దిశను చూపుతున్నాయని రాజకీయ విశ్లేషకుల అభిప్రాయం. త్వరలో టీడీపీలో కీలక మార్పులు జరిగే సూచనలు స్పష్టంగా కనిపిస్తున్నాయి.
