ఆంధ్రప్రదేశ్ రాజకీయాల్లో కడప జిల్లా ఎప్పటినుంచో ప్రత్యేక గుర్తింపు కలిగిన ప్రాంతం. ఒకప్పుడు వైయస్ రాజశేఖర్ రెడ్డి కుటుంబ ప్రభావం, ఆ తర్వాత వైయస్ జగన్మోహన్ రెడ్డి నాయకత్వంతో అక్కడ వైయస్సార్ కాంగ్రెస్ పార్టీకి బలమైన పట్టు ఉండేది. అయితే ఇటీవల జరిగిన ఎన్నికల్లో తెలుగుదేశం కూటమి ఘన విజయం సాధించడంతో కడప రాజకీయాల్లో కీలక మార్పులు చోటు చేసుకున్నాయి.
ఈ విజయానికి ‘రెడ్డప్ప గారి’ కుటుంబం కీలక పాత్ర పోషించిందన్నది బహిరంగ రహస్యమే. కడప ఎమ్మెల్యేగా మాధవి రెడ్డి గెలుపు, ఆమె భర్త శ్రీనివాస్ రెడ్డి జిల్లా అధ్యక్షుడిగా కొనసాగడం టిడిపికి బలంగా మారింది. అయితే ఎన్నికల అనంతరం నేతల మధ్య విభేదాలు పెరగడం, ఫ్రీహ్యాండ్తో వ్యవహరించారన్న ఆరోపణల నేపథ్యంలో పార్టీ హైకమాండ్ కీలక నిర్ణయం తీసుకుంది. జిల్లా అధ్యక్ష పదవి నుంచి శ్రీనివాస్ రెడ్డిని తొలగించడం కడప రాజకీయాల్లో హీట్ పెంచింది.
మారిన పరిస్థితుల్లో పార్టీ సమన్వయం అవసరమని భావించిన అధినేత చంద్రబాబు తాజాగా భూపేష్ రెడ్డిని జిల్లా అధ్యక్షుడిగా నియమించారు. ఈ నియామకం ద్వారా కడపలో ఒక వ్యక్తి లేదా కుటుంబ కేంద్రిత రాజకీయాలకు చెక్ పెట్టే ప్రయత్నంగా విశ్లేషకులు చూస్తున్నారు. కడప రాజకీయాల్లో ఇది కొత్త అధ్యాయానికి నాందిగా మారుతుందా? లేక కొత్త విభేదాలకు దారితీస్తుందా? అన్నది వేచి చూడాల్సిందే.
