ఆంధ్రప్రదేశ్‌ రాజకీయాల్లో మరోసారి సంచలనం రేగింది. ప్రజా ప్రతినిధులపై ఉన్న క్రిమినల్ కేసులపై ADR విడుదల చేసిన నివేదికను ఆధారంగా చేసుకుని మహా చానెల్‌ వంశీ చేసిన వ్యాఖ్యలు వివాదానికి దారితీశాయి.
ఆ రిపోర్ట్‌ ప్రకారం చంద్రబాబు నాయుడుపై 19, నారా లోకేష్‌పై 17, పవన్‌ కళ్యాణ్‌పై 8 కేసులు నమోదైనట్లు వెల్లడైంది. దీనిని ప్రస్తావిస్తూ వంశీ తన చానెల్‌లో “పవన్‌ నంబర్ 1 క్రిమినల్” అంటూ చేసిన వ్యాఖ్య, థంబ్‌నెయిల్‌లో అదే పదజాలాన్ని వాడటం జనసేన కార్యకర్తలను ఆగ్రహానికి గురిచేసింది.
పవన్‌పై రాజకీయ ప్రేరేపిత కేసులను చూపించి ఇలాంటి ముద్ర వేయడం అన్యాయం అని జనసేన వర్గాలు మండిపడుతున్నాయి. “కూటమి భాగస్వామి నాయకుడిని ఇలా లక్ష్యంగా చేసుకోవడం ఎలా సమంజసం?” అని ప్రశ్నిస్తున్నాయి. రాబోయే రోజుల్లో ఈ అంశం రాజకీయ వాదోపవాదాలకు దారితీయడం ఖాయం.
