మహా టీవీ యాంకర్ మహా వంశీ తాజాగా తన చానెల్ లైవ్లో వ్యక్తం చేసిన ఆవేదన ఇప్పుడు రాజకీయ వర్గాల్లోనే కాదు… సోషల్ మీడియాలో కూడా చర్చనీయాంశంగా మారింది. నారా లోకేష్ గారి ఇమేజ్, బ్రాండ్ను అనవసరంగా, అనాలోచితంగా కొందరు దెబ్బతీస్తున్నారని ఆయన తీవ్ర అసంతృప్తి వ్యక్తం చేశారు.
లోకేష్ గారు ప్రస్తుతం ఢిల్లీలో రాష్ట్రం కోసం ఎంతో కృషి చేస్తున్నారని మహా వంశీ స్పష్టం చేశారు. కేంద్రంతో చర్చలు జరుపుతూ ఏపీకి నిధులు తీసుకురావడం, పెట్టుబడులు ఆకర్షించడం వంటి కీలక బాధ్యతలను ఆయన సమర్థంగా నిర్వహిస్తున్నారని ప్రశంసించారు. అలాంటి సమయంలో సందర్భం లేని అంశాల్లో, అసలు వివాదమే లేని విషయాల్లో లోకేష్ పేరును లాగి ఇన్వాల్వ్ చేయడం వల్ల ఆయనకు రాజకీయంగా నష్టం జరుగుతోందని వంశీ ఆవేదన వ్యక్తం చేశారు.
చానెల్ లైవ్లోనే భావోద్వేగంగా మాట్లాడిన మహా వంశీ… “లోకేష్ గారి తరపున వకల్తా పుచ్చుకొని మాట్లాడాల్సి వస్తోంది” అన్న స్థాయిలో వ్యాఖ్యలు చేయడం విశేషం. ఇది కేవలం వ్యక్తిగత అభిప్రాయమా? లేక పార్టీ లోపలి అసంతృప్తికి సంకేతమా? అన్న ప్రశ్నలు కూడా తలెత్తుతున్నాయి.
అయితే ఈ వీడియో బయటకు వచ్చిన తర్వాత నెటిజన్ల స్పందన మాత్రం మరోలా ఉంది. “ప్రతి రాజకీయ పార్టీకి ఇలాంటి కార్యకర్తలు ఉండాలని కోరుకుంటారు” అంటూ కొందరు మహా వంశీని ట్రోల్ చేస్తున్నారు. నాయకుడిని వెనుక నుంచి ఇలా బలంగా సమర్థించడం భజన రాజకీయానికి నిదర్శనమంటూ విమర్శలు కూడా వెల్లువెత్తుతున్నాయి.
మొత్తానికి, మహా వంశీ ఆవేదన ఒక వైపు లోకేష్ ఇమేజ్ను కాపాడాలన్న ఆందోళనగా కనిపిస్తే… మరోవైపు రాజకీయాల్లో అతిగా జరిగే ‘సమర్థన’ ఎంతవరకు మేలు చేస్తుందన్న చర్చకు దారి తీసింది. ఈ వ్యవహారం పార్టీకి లాభమా? లేక మరింత వివాదాలకు దారి తీస్తుందా? అన్నది కాలమే చెప్పాలి.
